Vertu memm

Frétt

Ferðamenn hvattir til að draga úr plastnotkun og drekka kranavatn

Birting:

þann

Átakið Kranavatn

Þórdís Kolbrún Reykfjörð Gylfadóttir, ferðamála, iðnaðar og nýsköpunarráðherra og Guðmundur Ingi Guðbrandsson, umhverfis- og auðlindaráðherra

Ferðamenn eru hvattir til þess að draga úr plastnotkun og drekka kranavatn á ferð sinni um landið í nýrri markaðsherferð undir merkjum Inspired by Iceland í samstarfi við Umhverfisstofnun og hagaðila.

Í herferðinni er lögð áhersla á að kynna íslenska vatnið sem lúxusvöru undir heitinu „Kranavatn” sem finna má ókeypis í næsta krana um allt land.

Markmiðið er að draga úr óþarfa plastnotkun ferðamanna og vekja um leið athygli á gæðum íslenska vatnsins sem er eitt hreinasta og bragðbesta kranavatn í heimi. Með verkefninu er einnig ætlunin að styðja við umhverfisvernd og aðgerðir til að uppfylla Heimsmarkmið Sameinuðu þjóðanna.

65% nota meira plast á ferðalögum – áskorun um breytta hegðun

Í könnun sem framkvæmd var meðal 16.000 manns í Norður-Ameríku og Evrópu sögðust 65% aðspurðra nota meira af plastflöskum á ferðalögum heldur en heima hjá sér. Aðspurð um meginástæður þess nefndu 70% órökstuddan ótta við kranavatn og 19% nefndu þægindi. Í Kranavatnsherferðinni er skorað á ferðamenn að breyta þessu mynstri og drekka vatn beint af krana þegar þeir ferðast um Ísland og fylla á endurnýjanleg ílát í stað þess að kaupa vatn á plastflöskum.

Íslenska vatnið er lúxusvara

Fáar þjóðir hafa jafn gott aðgengi að vatni eins og Íslendingar. Íslenska vatnið er einnig sérstakt að því leyti að 98% af því er ómeðhöndlað grunnvatn og mælingar sýna að óæskileg efni eru langt undir viðmiðunarmörkum samkvæmt upplýsingum frá Umhverfisstofnun. Neysluvatn á Íslandi er alls staðar talið hreint og öruggt til neyslu og erlendir ferðamenn átta sig ekki allir á þeirri staðreynd.

Þórdís Kolbrún Reykfjörð Gylfadóttir, ferðamála, iðnaðar og nýsköpunarráðherra segir um herferðina:

„Það er ánægjulegt að geta boðið erlendum ferðamönnum sem koma til Íslands upp á þá lúxusvöru sem íslenska vatnið okkar er og vekja athygli á því hve aðgengilegt það er. Við tökum á móti rúmlega tveimur milljónum ferðamanna til Íslands á ári og margir þekkja ekki gæði kranavatnsins. Það er til mikils að vinna að efla þekkingu á því og stuðla þannig að minni plastneyslu ferðamanna hér á landi.“

Guðmundur Ingi Guðbrandsson, umhverfis- og auðlindaráðherra segir um herferðina:

„Í þessu verkefni felst mikilvæg áskorun til ferðamanna um að draga úr plastneyslu og nota heldur margnota flöskur sem fylltar eru með kranavatni. Um þessar mundir eru stigin fjölmörg mikilvæg skref við að minnka plastneyslu í heiminum. Kranavatnsverkefnið er eitt af þessum skrefum sem mun vonandi stuðla að ábyrgari hegðun ferðamanna á Íslandi og víðar um heiminn.“

Í fréttatilkynningu kemur fram að verkefnið er unnið undir merkjum Inspired by Iceland og sér Íslandsstofa um framkvæmd. Verkefnið er í samstarfi við Umhverfisstofnun og er styrkt að hluta af formennskuáætlun Íslands í Norrænu ráðherranefndinni. Inspired by Iceland er markaðsverkefni í samstarfi stjórnvalda og fyrirtækja og eru helstu aðilar Icelandair, Icelandic og Samtök ferðaþjónustunnar sem fulltrúar fjölda fyrirtækja í ferðaþjónustu.

 

Smári er matreiðslumaður að mennt, en hann hefur starfað við fagið til fjölda ára, bæði sem starfsmaður og rekstraraðili. Í dag starfar Smári hjá Tónaflóði heimasíðugerð. Hægt er að hafa samband við Smára á netfangið [email protected] Skoða allar greinar höfundar >>

Frétt

Ríkisstjórnin samþykkir enn frekari efnahagsaðgerðir vegna kórónuveirufaraldursins

Birting:

þann

Hrun - Covid 19

Ríkisstjórnin samþykkti á fundi sínum í morgun að grípa til frekari efnahagsaðgerða vegna kórónuveirufaraldursins. Er þar annars vegar um að ræða tillögur að útvíkkun tekjufallsstyrkja, en frumvarp um þá er þegar til meðferðar á Alþingi, og hins vegar nýtt úrræði, viðspyrnustyrki, sem ætlað er að styðja við rekstur fyrirtækja á komandi mánuðum.

Fjármála- og efnahagsráðherra mun leggja til við efnahags- og viðskiptanefnd Alþingis að gerðar verði breytingar til útvíkkunar á frumvarpi um tekjufallsstyrki þannig að úrræðið nái til fleiri rekstraraðila og gildi í lengri tíma. Tekjufallsstyrkir eru hugsaðir til að styðja við fyrirtæki sem hafa orðið fyrir verulegu tekjufalli vegna faraldursins frá vori til nóvembermánaðar (1. apríl – 31. október). Úrræðið mun nýtast fjölmörgum einstaklingum og fyrirtækjum sem m.a. hafa þurft að sæta takmörkunum vegna sóttvarnaráðstafana án þess að hafa verið gert að loka:

– fallið er frá skilyrðum um hámarksfjölda starfsmanna (3 skv. frumvarpi);
– lagt er til að styrkir verði veittir fyrir allt að 5 stöðugildi;
– styrkfjárhæð tekur mið af rekstrarkostnaði og tekjufalli: rekstraraðilar sem verða fyrir 40-70% tekjufalli geta átt rétt á styrk að fjárhæð 400 þús.kr. á mánuði á hvert stöðugildi, en sé tekjufallið 70-100% getur styrkur orðið 500 þús.kr. á hvert stöðugildi á mánuði;
– tímabil er lengt í sjö mánuði frá 1. apríl sl. að telja;
– hámarksstyrkur verður samkvæmt þessu 17,5 m.kr. á rekstraraðila.

Dæmi um styrkveitingar miðað við framangreindar breytingar er að finna hér að aftan.

Ennfremur mun fjármála- og efnahagsráðherra leggja fram frumvarp sem nú er í undirbúningi um nýtt úrræði, viðspyrnustyrki, sem gert er ráð fyrir að verði veittir í framhaldi af tekjufallstyrkjum og fram á næsta ár. Úrræðinu er ætlað tryggja að fyrirtæki sem orðið hafa fyrir tekjufalli vegna kórónaveirufaraldursins geti viðhaldið nauðsynlegri lágmarksstarfsemi á meðan áhrifa faraldursins gætir, varðveitt viðskiptasambönd og tryggt viðbúnað þegar úr rætist. Um viðspyrnustyrki munu gilda sambærileg skilyrði og eiga við um tekjufallsstyrki og verða þeir veittir með reglulegum greiðslum yfir a.m.k. sex mánaða tímabil eða allt fram á mitt næsta ár.

Þá ræddi ríkisstjórnin um mögulega framlengingu hlutabótaleiðarinnar sem rennur út nú um áramót. Hefur félags- og barnamálaráðherra þegar hafið undirbúning að framlengingu úrræðisins.

Loks má nefna að Alþingi hefur til meðferðar frumvarp fjármála- og efnahagsráðherra um framhald lokunarstyrkja. Í því felst að heimildir til greiðslu lokunarstyrkja miðast ekki eingöngu við takmarkanir sóttvarnaryfirvalda sem þegar hafa komið til framkvæmda heldur taka einnig til frekari takmarkana sem kunna að koma til síðar. Mun úrræðið ná til þeirra sem gert er að loka eða stöðva starfsemi og miðast undirbúningur að framkvæmd þess við að hægt verði að taka við umsóknum um lokunarstyrki um leið og málið er afgreitt á Alþingi.

Markmið framangreindra aðgerða er að tryggja sem best getu fyrirtækja til öflugrar viðspyrnu að faraldrinum loknum, að viðhalda samkeppnishæfni og að einfalda sem mest framkvæmd aðgerða til aðstoðar rekstraraðilum.

Dæmi um styrkveitingar miðað við framangreindar breytingar á fyrirliggjandi frumvörpum.

Rekstraraðili með fimm starfsmenn eða fleiri  sem gert var að loka (lokunarstyrkur og tekjufallsstyrkur)

Lokunarstyrkur í vor 3.600.000
Lokunarstyrkur í sept 1.000.000
Lokunarstyrkur í okt og til 3. nóv 2.900.000
Tekjufallsstyrkur ef 70% – 100% tekjufall 17.500.000
Hámark tekjufallsstyrks ef rekstraraðili hefur fengið hámark lokunarstyrkja fyrir

lokanir til 3. nóv.

10.000.000

 

Lokunarstyrkur í vor 3.600.000
Lokunarstyrkur í sept 1.000.000
Lokunarstyrkur í okt og til 3. nóv 2.900.000
Tekjufallsstyrkur ef 40% – 70% tekjufall 14.000.000
Hámark tekjufallsstyrks ef rekstraraðili

hefur fengið hámark lokunarstyrkja fyrir lokanir til 3. nóv.

6.500.000

Rekstraraðili með 5 starfsmenn eða fleiri sem ekki var gert að loka en myndi eingöngu eiga rétt á tekjufallsstyrk – miðast við hámark tekjufallsstyrks

70% – 100% tekjufall 17.500.000 2.500.000 á hvern mánuð
40% – 70% tekjufall 14.000.000 2.000.000 á hvern mánuð

Mynd: úr safni

Lesa meira

Frétt

Hertar sóttvarnaráðstafanir – Veitingastaðir mega hafa opið til 21.00 – Krám og skemmtistöðum lokað

Birting:

þann

Frá fréttamannafundi 13. mars 2020 þegar tilkynnt var um takmarkanir á samkomum á skólahaldi

Frá fréttamannafundi 13. mars 2020 þegar tilkynnt var um takmarkanir á samkomum á skólahaldi

Heilbrigðisráðherra hefur fallist á tillögur sóttvarnalæknis um hertar sóttvarnaráðstafanir sem taka gildi laugardaginn 31. október. Sömu reglur munu gilda um allt land. Meginbreytingin felst í 10 manna fjöldatakmörkum í stað 20 áður. Allt íþróttastarf verður óheimilt og sviðslistir sömuleiðis. Gert er ráð fyrir að reglur um hertar aðgerðir gildi til og með 17. nóvember. Þær verða endurmetnar eftir aðstæðum með hliðsjón af því hvort hægt verði að aflétta þeim fyrr, eða hvort framlenging sé nauðsynleg.

Í minnisblaði sóttvarnalæknis kemur fram að smit í samfélaginu sé enn mikið, þrátt fyrir hertar sóttvarnaaðgerðir sem gripið var til 20. október síðastliðinn. Því sé hætta á að hópsýkingar brjótist út og valdi enn meira álagi á heilbrigðiskerfið sem sé mikið fyrir. Bent er á að Landspítali sé á neyðarstigi vegna mikils álags og að margvíslegri heilbrigðisstarfsemi hafi verið frestað til 15. nóvember. Mikið álag sé á þeim fimm farsóttarhúsum sem nú eru starfrækt og meira um veikindi meðal þeirra sem þar eru í einangrun en áður hefur verið í faraldrinum. Því er það mat sóttvarnalæknis að grípa þurfi til hertra aðgerða til að takmarka útbreiðslu veirunnar og koma þannig í veg fyrir alvarlegar afleiðingar af völdum COVID-19 og annarra sjúkdóma.

Helstu takmarkanir:

  • Allar takmarkanir ná til landsins alls.
  • 10 manna fjöldatakmörk meginregla.
    – Heimild fyrir 30 manns í útförum en 10 að hámarki í erfidrykkjum.
    – 50 manna hámarksfjöldi í lyfja- og matvöruverslunum en reglur um aukinn fjölda með hliðsjón af stærð húsnæðisins.
    – Fjöldatakmarkanir gilda ekki um almenningssamgöngur, hópbifreiðar, innanlandsflug eða störf viðbragðsaðila.
    – Fjöldatakmarkanir gilda ekki um störf ríkisstjórnar, ríkisráðs, Alþingis og dómstóla.
  • 10 manna fjöldatakmörk eiga ekki við þegar fleiri búa á sama heimili.
  • Íþróttir óheimilar.
  • Sundlaugum lokað.
  • Sviðslistir óheimilar.
  • Krám og skemmtistöðum lokað.
  • Veitingastaðir með vínveitingaleyfi mega ekki hafa opið lengur en til 21.00.
  • Grímuskylda þar sem ekki er unnt að tryggja 2 metra nálægðarmörk milli einstaklinga sem ekki eru í nánum tengslum.
  • Börn fædd 2015 og síðar undanþegin 2 metra reglu, fjöldamörkum og grímuskyldu (gilti áður um börn fædd 2005 og síðar).

Undanþáguheimildir:

  • Ráðherra getur veitt undanþágu frá takmörkunum vegna félagslega ómissandi innviða sem mega ekki stöðvast. Þar undir fellur m.a. heilbrigðisstarfsemi og félagsþjónusta.
  • Ráðherra getur veitt undanþágu við banni frá íþróttastarfi fyrir einstaka viðburði, til dæmis alþjóðlegra keppnisleikja.

 Reglugerð um samkomutakmarkanir vegna farsóttar
 Minnisblað sóttvarnalæknis

Ný reglugerð um takmarkanir á skólastarfi verður kynnt í næstu viku.

Mynd: stjornarradid.is

Lesa meira

Frétt

Ólöglegt skordýraeitur í baunum

Birting:

þann

Black eye beans

Matvælastofnun varar við neyslu á TRS Asia´s finest foods black eye beans sem Lagsmaður ehf. og Kína Panda ehf. flytja inn vegna þess að það greindist ólöglegt varnarefni (chlorpyrifos) í baununum. Heilbrigðiseftirlit Hafnarfjarðar, Garðarbæjar og Kópavogs (HHGK) og Heilbrigðiseftirlit Suðurnesja (HSN) aðstoða fyrirtækin með innköllun.

Matvælastofnun fékk upplýsingar um vörurnar í gegnum evrópska hraðviðvörunarkerfið RASFF um hættuleg matvæli á markaði og gerði heilbrigðiseftirlitinu viðvart.

Innköllunin á einungis við eftirfarandi lotu með best fyrir dagsetningu 30.04.2022:

Vörumerki: TRS Asia’s finest foods
Vöruheiti: Black eye beans
Innflytjandi: Lagsmaður ehf.
Lotunúmer/best fyrir dagsetningar: P70463 með best fyrir dagsetningu 30.04.2022
Dreifing: Fiska.is, verslanir Fiska.is á Nýbýlavegi 6 í Kópavogi og Lóuhólum 2 Reykjavík, ásamt Kína Panda ehf. í Keflavík.

Viðskiptavinum sem keypt hafa vörurnar er bent á að farga þeim eða skila til þeirrar verslunar þar sem þær voru keyptar. Frekari upplýsingar eru veittar á netfanginu [email protected]

Mynd: aðsend

Lesa meira

Podcast/hlaðvarp

Ekki missa af neinu

Fréttabréf

Veldu eitt eða allt af eftirtöldu:

Mest lesið í dag